صدها مهاجر افغانستانی از تاجیکستان به کانادا منتقل شدند

 وزارت مهاجرت کشور کانادا می‌گوید که  صدها پناهجوی افغانستانی را  که در تاجیکستان از یک سال به این سو گیر مانده بودند در یک پرواز ویژه روز چهارشنبه از تاجیکستان به کانادا منتقل کرده است.

شان فریزر وزیر مهاجرت این کشور با نشر توییتی می‌گوید  به شمول این 300 مهاجر تازه وارد تاکنون ۲۰ هزار و ۳۵۰ شهروند افغانستان به کانادا انتقال یافته اند.

با سقوط کابل، کانادا اعلام کرد که ۴۰ هزار افغان را می‌پذیرد.

وزیر مهاجرت کانادا نوشت:” به خانه خوش آمدید”

در هفته‌های اخیر کانادا در چند پرواز ویژه صدها پناهجوی افغان را از پاکستان به این کشور انتقال داده است.

پس از انتقادها از روند کند انتقال پناهجویان افغان، اداره مهاجرت کانادا اعلام کرد که این روند را سرعت می‌بخشد.

صدها افغان هم اکنون در کشورهای دومی منتظر انتقال به کشورهای اروپایی و کانادا استند.

کانادا سال قبل با سقوط حکومت پیشین اعلام کرد که ۴۰ هزار شهروند در معرض خطر از افغانستان را می‌پذیرد.